تعارف

البشرٰی ویلفیئر اینڈ ایجوکیشنل ٹرسٹ ایک وقف ادارہ ہے جس کا مقصد علم کی روشنی کو دنیا بھر میں پھیلانا اورمعیاری اسلامی تعلیمات عصرِ حاضر کے تقاضوں کے مطابق ڈھالنا ہے۔ اس سفر کا آغاز احادیثِ مبارکہ اور دیگر مستند اسلامی اور درسى کتب کی رنگین اور معیاری طباعت سے ہوا۔ البشریٰ نے یہ کتب پاکستان اور دنیا کے ہر کونے میں رعایتی قیمتوں پر فراہم کرنے کا عزم کیا ہے تاکہ ہر فرد، چاہے وہ کہیں بھی ہو، صحیح اسلامی تعلیمات سے روشناس ہو سکے۔ 

علم ایک ایسا قیمتی سرمایہ ہےجو انسان کودنیا و آخرت کی بھلائیوں کی طرف رہنمائی کرتا ہے اور جہالت کے اندھیروں کو ختم کرتا ہے۔

ہمارا مقصد

اس بات کو یقینی بنانا ہے کہ علوم ِاسلامیہ کو معیاری انداز میں اہلِ علم اور عوام تک پہنچایا جائے۔ اور یہ ہماری ذمہ داری ہے کہ ہم قرآن اور حدیث کی صحیح تعلیمات کو مستند طریقے سے دنیا کے ہر گوشے تک پہنچائیں۔

اداره كا مقصد يہ بھی ہے کہ ہر فرد علم کی روشنی سے روشناس ہو اور سچائی کی جستجو میں اپنا سفر طے کرے۔ یہ وہ علم ہے جو نہ صرف انسانی معاشرت کی اصلاح کرتا ہے بلکہ روحانی سکون بھی فراہم کرتا ہے۔ اس علم کی ترویج کے لیے ادارہ اپنی کتب کو ایک مضبوط ذریعہ بنانا چاہتا ہے تاکہ ہر فرد کو اللہ  تعالى کی ہدایات تک رسائی حاصل ہو سکے۔

تاریخ

البشرٰی ویلفیئر اینڈ ایجوکیشنل ٹرسٹ کا آغاز 2001 میں ہوا ۔ آج  اللہ تعالى کے فضل سے ایک مستقل ٹرسٹ کے طور پر قائم ہے ، جس کا مقصد اسلامی تعلیمات کی ترویج ہے۔ اس ادارے کی بنیاد ایک نئے وژن اور مضبوط عزم کے ساتھ رکھی گئی تھی، جو آج تک جاری وساری ہے ، جس کے نتیجہ میں آج کتب کی تصحیح اور ان کی اشاعت جدید تقاضوں کے مطابق ہو رہی ہے ۔  فللّٰه الحمد والشکر.

ادارے میں علماء،  محققین، مصححین اور کمپوزروں پر مشتمل ماہر افراد کی جماعت موجود ہے، جو ہر کتاب کی تحقیق اور تصحیح کے عمل میں مصروف ہے۔ ادارہ صرف یہی نہیں چاہتا کہ اس کی کتب تعلیمی معیار میں بلند ہوں، بلکہ ان کے ذریعے دینی علم کی ترویج بھی ہو۔

ہمارا مشن: جديد معيار كے مطابق کتب کی فراہمی

ہم عصرِ حاضر كے تقاضوں اور  جدید معیارات کے مطابق کتب فراہم کریں، تاکہ طلبہ اور عوام میں گہرے مطالعے کا شوق اور دلچسپی پیدا ہو۔  اس سلسلہ میں الحمد للہ ادارے نے  بڑے پیمانے پر درسی واصلاحی کتب کی نشر و اشاعت کی ۔

احیاء سننِ نبویہ

حضور اقدس ﷺ کے پیغامِ حق کو دنیا بھر میں پھیلایا جا سکے۔ اور آپ ﷺ کی سنتوں کا احیاء کیا جا سکے۔ اس کی ایک مثال یہ بھی ہے کہ حجامہ ایک مسنون طریقۂ علاج  ہے مگر ہمارے دیار میں  ایک طویل عرصہ سے یہ سنت تقریباً متروک ہو چکی تھی۔ اللہ تعالی کے فضل وکرم سے ڈاکٹر امجد علی رحمۃ اللہ  تعالى عليہ کی  کتاب «الحجامة» کی کتاب کی اشاعت کے بعد اہلِ فن کی توجہ اس طرف ہوئی اور اب بحمد اللہ  یہ سنت معروف اور رائج ہو چکی ہے۔ اور بے شمارے لوگ اس کے فوائد سمیٹ رہے ہیں۔

تعلیمی معیار کے مطابق کتب کی تیاری

ہماری مطبوعات کا بڑا حصہ درسیات پر مشتمل ہے، اس لیے ہماری  کوشش کی ہوتی ہے کہ اہلِ علم کی مشاورت اور تعلیمی بورڈز خاص طور پر وفاق المدارس العربیہ کے بیان کردہ نکات اور خاکے کے مطابق سے کتب کی تیاری و اشاعت ہو۔ چناں چہ فن تجوید ميں «جمال القرآن» اور «فوائد مکیہ»، فن صرف میں «علم الصرف» اور«تعريب علم الصیغة»،   فن نحو میں «علم النحو»،  «هدایة النحو »اور «الکافیة»، جب کہ فن  بلاغت  میں «دروس البلاغة» میں تمرینات، معروضی سوالات اور جداول وغیرہ شامل کر کے ان کو شائع کیا گیا ہے۔

عربی زبان کی ترویج

بعض ایسی مفید سلسلہ وار کتب کی اشاعت کی گئی جن کے شاملِ درس کرنے طلبۂ کرام میں عربی انشاء وتکلم کی صلاحیتیں اجاگر کرنے میں واضح کامیابی ملی، اور الحمد للہ شائقین عربی زبان کی طرف سے اس خدمت کو بھرپور پذیرائی ملی ۔ مثلاً «لغتي العربیة»، «التعبیر الإنشائي المصوّر»، «دروس اللغة العربیة» (للأطفال)، «دروس اللغة العربیة»، «نحو الآفاق»،  «المیسر في تعلیم اللغة العربیة» (للبنین)، «المیسر في تعلیم اللغة العربیة» (للبنات)، «کتاب الحوارات والتدریبات» (للبنین) اور «کتاب الحوارات والتدریبات» (للبنات)۔

تحدیث بالنعمۃ

 ارشاد باری تعالی ہے: ﴿وَأَمَّا بِنِعۡمَةِ رَبِّكَ فَحَدِّثۡ11﴾ (الضحی: 11) ”اور اپنے پروردگار کے انعامات کو بیان کرتے رہیے۔“ حضراتِ مفسرین اس آیت کے ذیل میں لکھتے ہیں کہ انسان کو اللہ تعالی کسی دینی يا دنیوی نعمت سے نوازیں تو تکبّر کے طور پر نہیں بلکہ اللہ تعالی کے شکر کے طور پر اسے بیان کرنا چاہیے ۔ چناں چہ علماء کرام ، عزیز طلبہ اور دیگر قارئین کی طرف سے وقتاً فوقتاً موصول ہونے والی آراء اور ہماری مطبوعات کی بڑھتی ہوئی مقبوليت کو دیکھ کر ہمیں الحمد للہ یہ حسنِ ظن ہے کہ اہلِ علم نے البشری کو اللہ تعالى کے فضل سے اسم با مسمی قرار دیا  ہے ۔ دعا ہے کہ اللہ جل شانہ ہمارے اس حسنِ ظن کو سچ ثابت کر دے اور جمیع ارکان، کارکنان اور معاونین کے لیے صدقہ جاریہ اور ذریعہ نجات بنا دے۔ وما توفیقنا إلا بالله.